شويفة ركبات.... محمد حديش

 من ديواني الزجلي جدبة الحروف.

شْويفَة رَگْباتْ

~~~~~~~

شَفْتْ شْويفَة رَگْباتْ مَنْ بْعيدْ 

زينْ مَكْمولْ تْرَبَّعْ عَشْقو فَالْگَلْبْ 

خْطَفْ مْجاجي ؤُطارْ بِيا مَبْهورْ 

عْلَى بَغْتَة جاتْ عِيني فْ عِينِيها 

تْبَسْماتْ لِيا وْحَدْراتْ رْموشْ زِّينْ 

هِيْ مَنْ بْلادْ بْعيدَة بِينَتْنا بْحورْ   

وَالْعَطْفَة ما تْشاوَرْ مْني تَخْتارْ 

آشْ يْديرْ الوَلْهانْ گَدَّامْ المَحْبوبْ 

غيرْ إِسَلَّمْ وْيَرْخي لْجامْ الغْرامْ 

گَالو ناسي تْهَبَّلْ يَعْشَقْ بَرَّاني 

گولْتْ ياناسْ ديرو مَلْحْ الْكْلامْ 

الغْرامْ تْعَسَّلْ شَهْدْ مْرَبَّعْ فَالْگَلْبْ  

مايْشاوَرْ مُولاهْ حْلاوْتو تَسْحَرْ 

وَالْعَطْفَة سَكْناتْ دَگَّاتْ فِيا وْتادْ 

وْرا مَشْقوفْ النِّيتْ بْداتْ الْقَصَّة 

قَرَّبْ الْبْعيدْ بْحورْ وَلَّا مْعاكْ دِيما 

هِيَ رُومِيَة عارْفَة تَعْرابْ الكْلامْ 

سْحَرْني زينْها وَعْقَلْها المْفَطَّنْ    

عْجَبْها حَرْفي المْزَمَّمْ فْداكْ لَزْرَگْ 

تْغَرْماتْ بِيا وَنا مْبَحَّرْ شَلَّا قْوافي 

لْغاتْ بَالْغايا بَكْلامْ سْحَرْ النَّفْسْ 

فَرْشاتْ شْعَرْها الذَّهْبي عْطورْ 

وَتْنَهْداتْ مْحَسْرَة لْدوكْ لِّي خَلَّاتْ 

عْجَبْها أَخْلاقْ دينَّا الكْريمْ ؤْبْكاتْ     

گالَتْ نَشْكَرْ رَبِّي لِّيهْداني لْدينْكُمْ 

عَنْدْكُمْ كَنْزْ يْعَزْكُمْ فُوقْ كُلْ الأُمَمْ 

سَعْدادَتْ لِّي تْنَوَّرْ بْدينْ الإِسْلامْ 

كَرَّمْ الْمَرْأَة وْالإِنْسانْ ؤُعَلَّا الشَّانْ 

شَكْراتْني گالَتْ أَنا سْبابْ الهْدِيَّة     

گولْتْ شَكْري رَبْنا الْهادي الْكريمْ      

كُلْنا عْبادو سَبْحانو عَرَبْ ؤُعَجَمْ 

فْرَحْ گَلْبي بَالهْدِيَة المْقَدْرَة الْفوقْ 

ؤُكْتَبْتْ قَصْتي المْعَشْقَة مْحَبَّة 

مْزَمْما صْفا الْگَلْبْ تْدَوَّن بَكْتابْ 

بقلم ذ.محمد حديش

م͠ج͠د͠و͠ب͠ آ͠ل͠ح͠رف͠

2019\05\15