رسالة الى امي... محمد عبلي
(رساله إلي امي)
،،،،،،،،،،،،،،،
وقالوا يامّه
كلام كتير إن الحزن
مع الوقت بيروح
ويموت،،
والأيام تخلّي القلوب
تشيخ وتترك تفوت،،
والبعيد ع العين ينساه الكلام
وبالتالي
السكوت،،
طلع يامّه كل كلامهم كدب،،
وأديني من ساعه الفراق
ببكيكي ياأم القلب
خس وياقوت،،
وأديني فاكرك
منين مروح
وبفوت،،
معقوله يامّه!!
طيب وعهد الله ما روحتي
عن بالي
لا ثانيه ولا دقيقه ولا ساعه
ولا يوم،،
عايشك يامّه صاحي ونوم،،
وصوتك
ف وداني
دايم دوم،،
وطيفك قاعد ف الفسحه
حدايا ،، بينادي
أجيبلك بصلايه
وفصّين التوم،،
لأجل الطبخ لعيال بالكوم
عايشك وكأنك بتصحّيني اليوم
قوم يابني
فجرالله ادن
كفاياك نوم،،
واعمل نايم تيجي
تطبطبي ع ضهري
فينزاح وجع الحيل،،ووخم الليل،،
وأسبح ف حنانك عوم،،
طيب وعهد الله يامّايه
أنا زي الطفل اللي
ماتت امّه من دا اليوم،،
وكتير اشتاق أسمع صوتك،،
وآكل قوتك،،
ويجيلي الحزن
يشق القلب نصين يامّه
مامصدّق موتك،،
لكن يامه هي الأقدار،،
كلنا ماشين،،رايحين ،،
وآديني
مستني اول قطر
يعدّي يودّيني حداك،،
بدّي اكون وياك،،
مشتاقلك يامّايه
يكتبلي المولي
الجنّه معاك،،
فاكرك يامّه
وعبيط من قال
لحظه ف يوم ممكن
أنساكي،،
وازاي هنساك وشروقي
بيطلع من فاكي،،
كان قاسي الموت يامّه
ف رفضه ياخد
روحي فداكي،،
سلامات يامّه كتير،،
ولابويا برضو كتير،،
ولاخويا وأختي
ولكل اللي حداك،،
ولحد ما جيلك يامّايه،،
عهد علئ مش راح
أنساكي،،
(التوقيع أبنك)
،،،،،،،،،،،،،،،،،،،،،،،، عبلّي
تعليقات
إرسال تعليق