أجمل امرأة... علي عجمي
( أجمل إمراة ) للشاعر د. علي مسلم عجمي
------------
سِحِرها من السما نازل مِثالي
ضِياها رَقَّص نجوم الليالي
البدر عا خدها قرر مصيرو
و طبع عجبينها من النور هالة
الورد و الزهر و الكادي عبيرو
عُطر أنفاسها طيِّب و حالي
النحل عشفافها باني قفيرو
المروج الخضر صاروا من الخوالي
شعاع عيونها عَيَّن سفيرو
ضياء الشمس حصريا يلالي
رشاقة قدها لصفوة حريرو
غصن البان قدَّم إستقالة
الورد من شعرها أسَّس سريرو
مرجوحة بأهازيج و تسالي
و سَكَب من ريقها الصافي عصيرو
و لأجلو ترك معصور الدوالي
البلبل ما قِدِر رَتَّل صفيرو
لوما يمنحو صوتا وِكالة
الشمس و القمر كيف بدهم ينيرو
لولا شعاع عينيها المِثالي
الحواري بلشوا منها يغيرو
ما وصلوا لوصفها شي استحالي
عرش الحِسِن تَوَّجها أميرو
الجمال ال عندها خاص و خيالي
شعوري بحسنها ريَّح ضميرو
عند ما شفتها وقفت قبالي
و إذا وصفي أنا ما مصدقينو
غيري قبالها يوقف بدالي
الشاعر : د. علي مسلم عجمي
لبنان
تعليقات
إرسال تعليق