الوصايا العشر... عبد الحفيظ جابر
الوصايا العشر
لو بقيت عظم في قفة
هاجري عليك واتكفة
واترمي ف حضنك وادفة
زي ما جريتي عليا
وانا على الحافة
ولما كنت بتنصحيني
لجل ما تنوري عقلي
وتعدلي الميزان والكفة
واحنا مشين في الطريق
إحنا رايحين عند عمك
أولاً تقعد جنبي ما تتحركش
لو قرصتك حية متتهرش
منديلك في جيبك
عشان م تمسحش في كمك
ولا عايزهم يتمقلتوا
على أمك ويقولوا ماربتش
تطلع منديلك لجل
نفة أو لجل تفة
وإلا هانعاود البيت
وفيك بسناني هاتشفة
مداسك تقلعه بره الشقة
وتركنه على جنب
وبلاش تضرب في أولاد
عمك ملهمش ذنب
لو حد قالك أقعد كل
ما تقعدش قبل
ما يقعد الكل
وطبعاً نحن مسلمين
يا غلام سمي الله
وأكل بيمينك وأكل ممايليك
وماتوقعش طعام عليك
ولو جاء عمك يعطيك جنيه
أنت وأولاده لجل ما
تشتريلك كيس كراتيه
إياك تقوم من مكانك
وبسرعة تجري عليه
لو نفذت كلامي هاجيب لك
كل إللي نفسك فيه
ياولدي عمك غلبان
زي حلتنا له بيه
ولا راكب شيفروليه
ده يا دوبك مرتبه مكفيه
كان نفسك يا أمي
تعدلي الكفة
قبل ما ميزان العدل
يميل ويتكفة
والطفل وهوه فاللفة
يقولوا له تف على
جدو كام تفة
وعجبي
رحمة الله عليك يا أمي
بقلمي/عبد الحفيظ جابر شيبه
تعليقات
إرسال تعليق