ليلة قدر...بقلم د.عز الدين أبو ميزر

من ذكرياتي
قصيدة باللغة المحكيّة كتبتها عندما تخرّج ابني الدكتور عمر.1986
بعنوان:
ليلة قدر....

لِيلِةْ قَدِرْ...

عِتِمْ هَالّليلْ... وِالعِتِمْ

لو كُنتْ تدري شو العِتِمْ

شِبْهِ الوَحِشْ

مرّت عليه إيّام...مشدودْ

ومن كُثْرِ العَزِمْ

يرعشْ رَعِشْ

واقفْ وكلّو عيونْ

ملهوفْ عا صِيدِهْ بعد ملهوفْ

لو شفتو وكان قلبكْ من صخر مقدودْ

يِجمدْ ويغمى من القهِرْ والخوفْ

والقلب مثل الليل عتمِهْ والقمرْ

كسلان ما بدا منّو أثرْ

وفجأهْ شَمِسْ

ما هي الشّمسْ يلّلي جميعْ النّاسْ تعرفها

بعزّ الليلْ

بنصّ الليلْ

طلعتْ وملّت الدّنيا ضِيا

وفوقْ صفحةْ خدها ارتسمْ

مليونْ بسمةْ حبّْ

ملوّنِهْ بلونْ الفراشْ

سبحانْ ربّ الكونْ

سبحانْ من صَوّرْ

يخلقْ من عَدَمْ

ومن لون واحدُ لو يشَا

مليون لون ولونْ

وشفافها غدت ..صارت

نغماتْ عا أحلى وترْ

ويَخي يَخي بلمح البصرْ

الليلْ صار نهارْ

والأرض فيها كلّ غُصنْ نَوّرْ

والقلبْ ... شي أغربْ من حواديت الزّمانْ

بلحظهْ انتشى واخضَرّْ

وصار بستانْ

لمّا نجوم السّما نزلت مطرْ

وكل حبّه من المطرْ

تِحمِلْ خَبَرْ

وبشارة حلوةْ معطّرةْ مثل العسلْ

لا ..لا  شو العسلْ

واللهْ فَشَرْ كل العسلْ

حتّى عسلْ نيسانْ المْقطّرّْ

هذا خبَر ...ولا كلّ خبرْ

لا من سنةْ لا من شَهَرْ

مَضّيتْ خمس سنين من العُمُرْ

القلب يخفق وينتظرْ

يِهدا بلهفِةْ وينتظرْ

لَلْيومْ تَيِسمعْ خبرْ

إنّو عُمَرْ

وليدي عُمَرْ

خلّصْ علامو اليومْ

ومن أوسع بوابو عَبَرْ

والقلبْ يندَهْ من الفَرحْ

وهرجو صِدِقْ

والربّ يشهد والخَلِقْ

إنّو صِدقْ

ما هو كلام الليلْ يمحيه الصّبُحْ

لو كان بيدي ولو مرّةْ بالعُمُرْ

أهدي الحِلو يا ناس من عمري عُمُرْ

والليلةْ يا كلّ البشَرْ

يا زهورْ يا طيورْ يا عشب أخضرْ يا شجرْ

بَنْدْهْ بعالي الصّوتْ

الليلةْ يا كلّ البشرْ

ليلةْ قَدِرْ

د.عزالدّين