رياح الحلفة... محمد حديش

 زجل

~~~ 

رْياحْ الْحَلْفَة

~~~~~~~

وَحَقْ رَبْ هاذْ السْمَاء

الزَّرْقاء ؤُبْديعْ لْوانْها

إٍيييه هاذْ السْمَاء

بَلْوانْ تَرْباعْ فْصولْها 

صَيْفْها مْعَ خْريفْها

وْشَتْواها مْعَ رْبيعْها

لَمَا الذَّاتْ مَرْيوحَا   

بْجَدْبَة مْلوكْ الحْروفْ    

       

وَحَقْ رَبْ هاذْ الْكونْ

السَّابَحْ فيهْ مَفْقُودْ

والمْدَبّرْ فيهْ مولودْ

لَمَا سْواكْني تَزْهَر

بْضَيْ تَحْتْ الْبابْ

وْراهْ عينْ سَهْرانَة  

وَقْلَمْ مْعَنَّڭْ الصْباعْ  

حالَفْ لَيْتَمْ الشُّوفْ     

     

عْلى نَغْمَة فْ الرَّاسْ

عْلى حَكْمَة فْ العْقَلْ

نَغْماتْ القَلْبْ بْرَنَّة

وْلاَّتْ ضَمَّة ؤُمَسْكونْ

تْخَطَّاتْ حَدْ الحْدودْ

مَلِّي الزَّفْراتْ تَرْكَضْ 

ف مَحْرَكْ حَرَّاني

ڭَلْعاتْ بَرْوانْ مَنْتوفْ     

    

وَحَقْ الْعالي فْ سْماهْ

لِّي كَرَّمْنا بَعْلامْ الْحَرْفْ

وْنَوَّرْنا مَنْ هْدِيَّة ضَيُّو

حْتَّى تَلْهامْ الكَمْعَة 

يَهْتَفْ بَكْلامْ فْ رَمْشَة

يْزَمَّمْها السَّاكَنْ فْ الرَّاسْ

بَمْدَادْ عْروقْ الرُّوحْ 

مْوَجْعَة بَحْمَلْ مَكْلوفْ        

وَلِّي ڭَالْ الجَّدْبَة خْوا   

يَدْخَلْ لَرْحَبْتْها يَتْزَوَّدْ

عَنْدْ شْياخْ الحَضْرَة

مَّالينْ غَوْصْ اللُّوحْ

مَنْ رَقراقْ سْڭَيْتْهُمْ   

تَشْرَبْ الرّْوحْ الصْفا

إِمْكَنْ تَسْلَكْ الْطْريقْ

تْنَوًّرْ بَقْمارْهُمْ الْهوفْ     

    

وَحَقْ رَبْ سْما وَالأرْضْ

حْتَّى شَهْقاتْ المْحَبَّة

كَتْفاجي ديكْ الكَرْبَة

ؤُدَّاوي تَوْعاتْ الْحالْ

مْنَحْيا شَطْنَتْ الْبالْ

عْلى حَرْفْ مْعشَّقْ

زَرْعو الْخالَقْ فَطْرَة

مْتَقَّلْ عَيْطَتْ الكْفوفْ      

   

ؤُمَنْ تَمَّ لْتَمَّاكْ حَلْفَة

سَلْمَتْ النَّفْسْ تَسْليمْ 

حْناتْ ڭَاشوشْ الْخاطَرْ

عْلَى هيتْ التَّحْيارْ

عْلَى رْموشْ التَّزْيارْ

شَمْراتْ بْعيطَة لَلْعالي

يْفَرَّجْها بْجودْ سْخاهْ

ؤُيْكادْ رْفوفْ الجُّوفْ

بقلم ذ.محمد حديش

~~~~~~~~~~

26/04/2024